တရုတ်နိုင်ငံမှ မိုးမျှော်တိုက်ကြီးတစ်ခု လှုပ်ရမ်းသွားသဖြင့် ရှန်းကျန့်မြို့လယ်ခေါင်တွင် ထိတ်လန့်မှုများဖြစ်ပွား

ပေကျင်း၊ မေ ၁၈

တရုတ်နိုင်ငံရှိ အမြင့်ဆုံးမိုးမျှော်တိုက်ကြီးများအနက် တစ်ခုသည် ယနေ့မွန်းလွဲပိုင်းက အတန်ငယ် လှုပ်ယမ်းသွားသဖြင့် ယင်းတိုက်ကြီးတည်ရှိရာ တရုတ်နိုင်ငံတောင်ပိုင်းရှိ ရှန်းကျန့်မြို့လယ်ခေါင်မှပြည်သူများ ထိတ်လန့်မှုဖြစ်ပွားခဲ့ကြောင်းသိရသည်။

မီတာ ၃၀၀(ပေ ၉ဝဝခန့်)အမြင့်ရှိသော အဆိုပါ SEG ပလာဇာ သည် ဒေသစံတော်ချိန် ယနေ့ မွန်းလွဲပိုင်း ၁ နာရီခန့်က လှုပ်ရမ်းခဲ့ခြင်းဖြစ်ပြီး၊ ပလာဇာအတွင်းရောက်ရှိနေသူများ အလွန်ထိတ်လန့်ကာ အပြင်သို့ အလုအယက်ထွက်ကြခြင်း၊ ပြင်ပမှရှိနေသူများကလည်း အံ့သြထိတ်လန့်ခြင်းတို့ ဖြစ်ပွားခဲ့သည်။

ယင်းတိုက်ကြီးကို မွန်းလွဲ ၂နာရီ မိနစ် ၄၀ ခန့်တွင် ပိတ်လိုက်ကြောင်း ဒေသခံမီဒီယာများကဆိုသည်။

၂၀၀၀ ပြည့်နှစ်က ဆောက်လုပ်ပြီးစီးခဲ့သော အဆိုပါ SEG ပလာဇာသည် ရှန်းကျန့်မြို့၏ အဓိက အီလက်ထရွန်းနစ်စျေးကွက်၏ ဗဟိုချက်ဖြစ်သည်။

အရေးပေါ်အခြေအနေစီမံခန့်ခွဲမှုဆိုင်ရာအစိုးရအဖွဲ့များက အဆောက်အအုံကြီး လှုပ်ရမ်းရခြင်းအကြောင်းရင်းကို စုံစမ်းစစ်ဆေးနေကြဆဲဖြစ်သည်။

ထိုသို့စစ်ဆေးရာတွင် မြေငလျင်လှုပ်ရှားမှုမှတ်တမ်းများကို စစ်ဆေးသော်လည်း ရှန်းကျန်းမြို့နှင့် အနီးတဝိုက်တွင် ယနေ့ မြေငလျင်လှုပ်ရှားမှုမရှိကြောင်းသိရသည်ဟု သက်ဆိုင်ရာမှ သတင်းထုတ်ပြန်ချက်တွင်ရေးသားဖော်ပြထားသည်။

Ref: China skyscraper wobbles, spreading panic in downtown Shenzhen

crd